ஒரு நாள் சித்த வாழ்க்கை

ஒரே stressஆ இருக்கு. Relaxedஆ ஏதாவது செய்யணும். ஆனா 2 நாள் தான் விடுப்பு எடுக்க முடியும். அதுல யோகா, தியானம், உடற்பயிற்சி, மலையேற்றம், கொஞ்சம் fun எல்லாம் சேர்ந்த Relaxing Package ஏதாவது இருந்தா சொல்லுங்கன்னு ஒரு தோழி கேட்டார். இத்தனையும் 2ஏ நாட்கள்ல பண்ணினா, அதுவே ஒரு stress ஆகி விடாதா? என்று தோன்றினாலும், இது தான் நிதர்சனம். பிள்ளைகளின் வகுப்புகள், பிறந்தநாள் கொண்டாட்டங்கள், அரங்கேற்றங்கள், இசைக் கச்சேரிகள் என்று வார இறுதி நாட்களும் சூறையாடப்பட்டுக் கொண்டிருக்கும் இன்றைய பரபரப்பான வாழ்க்கையில், ஒரு நாள், ஒரு முழு நாள் எனக்காக, என் உடல் நலனுக்காகச் செலவிட முடியுமா? என்ற கேள்விக்குறியோடு தான், அட்லாண்டாவில் செப்டம்பர் 24, 2016 அன்று சித்த மருத்துவர், முனைவர் செல்வ சண்முகம் அவர்களால் நடத்தப்பட்ட ஒரு நாள் சித்த மருத்துவ வாழ்க்கை முறைப் பட்டறைக்குப் பதிவு செய்தேன்.

அன்று தான் யாரோ ஒருவருடைய நிறுவனத்திற்கு உழைப்பதற்காக அல்லாமல் எனக்காக 5 மணிக்கு எழுந்தேன். எழுந்தவுடன் முகத்தை மட்டும் கழுவி விட்டுச் செல்ல முடிந்தது ஒரு வசதி. காலை 5:45 மணி முதல் 11:00 மணி வரை "உடம்பே கோவில்" பகுதி. அங்கு போய் பற்பொடியால் பல் துலக்கினோம். பற்பசையின் தயாரிப்பு முறை, அடங்கியிருக்கும் பொருட்கள், அதன் இன்ன பிற தீமைகளையெல்லாம் விளக்கினார் Dr.செல்வ சண்முகம். பிறகு அங்கேயே தயாரான சூடான இஞ்சி தேநீர் (இஞ்சி, சீரகம், மல்லி விதை, கருப்பட்டி) வந்தது. தொடர்ந்து, ஒரு மணி நேர யோகா மற்றும் மூச்சுப் பயிற்சி. முடிந்ததும், வியர்த்த உடலுக்குக் குளு குளு நீராகாரம் (முதல் நாள் வடித்துத் தண்ணீர் ஊற்றிய சோறு, இஞ்சி, பெருங்காயம், கருவேப்பிலை, கல் உப்பு) குளிர்ச்சியைத் தந்தது. உண்மையில் காலையில் உடலுக்குத் தேவையான fuelஇது தான். இப்போது ஒவ்வொருவராக உட்கார வைக்கப்பட்டு, 1/2 டம்ளர் நல்லெண்ணெய் ஊற்றி வர்ம முறையில் தலை பிடித்து விடப்பட்டு, கண், காது, மூக்கில் எண்ணெய் விடப்பட்டு, 20 நிமிடங்கள் வெயிலில் உட்கார்ந்து விட்டுப் பின் சீயக்காய் தேய்த்துக் குளித்தோம். Swimming Pool வசதியுள்ள Club Houseல் நடந்ததால் ஆண்கள், பெண்களுக்கான தனித்தனி குளியலறை வசதியாக இருந்தது. எனக்குத் தெரிந்து குழந்தையாக இருந்த போது தான் இப்படியெல்லாம் குளிப்பாட்டி இருப்பார்கள். அடுத்து கபகபவென்று பசிக்க, கருப்பு இட்லி (கருப்பு உழுந்து, வெந்தயம், அரிசி, குதிரைவாலி), உழுந்தங்கஞ்சி (கருப்பு உழுந்து, அரிசி, வெந்தயம், தேங்காய், சுக்கு, கருப்பட்டி), பாசிப்பயிறு சுண்டல் (வேக வைக்காத முளைக்கட்டிய பாசிப்பயிறு, மிளகுப்பொடி, சீரகப்பொடி, இஞ்சி, கருவேப்பிலை, கொத்தமல்லி, கல் உப்பு) மற்றும் தேங்காய் சட்னி என்று தன்னார்வலர்கள் பார்த்துப் பார்த்து சமைத்த அருமையான காலை உணவை ஒரு கட்டு கட்டினோம்.

11:00 மணி முதல் 1:00 மணி வரை "உணவே மருந்து" என்ற தலைப்பில், இன்றைய விஞ்ஞான உலகில் உணவாகப் பயன்படுத்தப்படும் நச்சுப் பொருட்கள், அவற்றின் தீமைகள், அவற்றுக்குப் பதிலாகப் பயன்படுத்தப் படவேண்டிய சரியான பொருட்கள், அவை என்ன பெயரில் அமெரிக்காவில் அழைக்கப்படுகின்றன? எங்கு கிடைக்கின்றன? என்று நம் அன்றாட வாழ்வில் அனிச்சையாகப் பயன்படுத்தும் ஏராளமான பொருட்களைப் (எடு: Iodized Salt, Refined Oils, வெள்ளைச்சீனி, பால், மிளகாய், கோதுமை, மாமிசம், etc.,) பற்றிய விழிப்புணர்வை ஏற்படுத்தினார். எங்களது அரைகுறை இணைய மருத்துவ அறிவுக்கும் ஒரு தெளிவு கிடைத்தது. இடையே சுவையான இஞ்சி மோர் (மோர், இஞ்சி, கருவேப்பிலை, கொத்தமல்லி, கல் உப்பு) வந்தது. ம்ம்ம்ம்ம்ம்..... எந்த Sodaவும், Juiceம் இதற்கு ஈடாகாது. இந்த அருமையான விவாதம் முடிந்த பிறகு, அனைவரும் சேர்ந்து மதிய உணவு சமைக்க ஆயத்தமானோம். தன்னார்வலர்கள் காய்கறிகளை நறுக்கி வைத்திருக்க, 2 camping stoveகள் வாசலில் தயாராக இருக்க, நாங்கள் அனைவரும் கூடி வேடிக்கை பார்க்க, Dr.செல்வ சண்முகம் கூட்டாஞ்சோறு (சாமை, துவரம் பருப்பு, பெருங்காயம், மஞ்சள், சாம்பார்பொடி, தக்காளி, வெங்காயம், முருங்கைக்காய், கத்தரிக்காய், வாழைக்காய், மாங்காய், இஞ்சி) சமைத்தார். நாங்களெல்லாம் சிறு பிள்ளைகள் போல ஓடி ஓடி அவர் கேட்டதையெல்லாம் எடுத்துத் தந்தோம். அடுத்த அடுப்பில் தினை பாயாசம் (தினை, தேங்காய், கருப்பட்டி, நெய்) மனம் பரப்பிக் கொண்டிருந்தது. மோர்ச்சோறும் (நீராகாரத்திற்காக வடித்துத் தண்ணீர் ஊற்றிய பழைய சோறு, சுக்கு, பெருங்காயம், கல் உப்பு, மோர், மாதுளை), அரிசி வடகமும் ஒரு பக்கம் தயாரானது. எல்லாவற்றையும் cateringல் கொடுத்து விட்டு, நம் வீட்டு விசேஷத்திற்கு நாமே விருந்தினராய்ச் செல்லும் வசதி இன்று இருந்தாலும், நாமே நின்று, சுவைத்துச் சமைப்பதில் எப்போதும் ஒரு திருப்தி தானே! அதை அப்பட்டமாக உணர முடிந்தது அன்று.

அனைவரும் பேசிச் சிரித்து சாப்பிட்டு முடிக்க 3 மணியானது. எண்ணெய் தேய்த்துக் குளித்து, இப்படி வகை வகையாய்ச் சாப்பிட்டால் தூக்கம் தானே வரும். ஆனால் தூங்கக் கூடாது. இது கட்டாய விதி. மீறினால் ஜலதோஷம் தான் தண்டனை. எனவே அடுத்து இரண்டு மணி நேரத்திற்கு ஒரு சூடான விவாதத்தை சிறு உடற்பயிற்சியுடன் தொடங்கினார் Dr.செல்வ சண்முகம். முதலில் அதிகாலையில் எழ வேண்டிய நேரம், காலை உணவு, மதிய உணவு, இரவு உணவாக, அரிசி, கோதுமை இல்லாமல் என்னென்ன சாப்பிடலாம் என்று தொடங்கி, எப்படிச் சமைக்க வேண்டும், எப்படிச் சாப்பிட வேண்டும், எவ்வளவு நேரம் பதப்படுத்தலாம், அறுசுவைகளின் அவசியங்கள், முளைக்கட்டிய தானியங்களின் பயன்கள் போன்றவற்றை விவரித்தார். இடையே 5 மணி வாக்கில் முறையாகச் சுக்கு காப்பி போட்டுக்காட்டி, குடிக்கவும் தந்தார். பின் அன்னப்பொடி, அகத்தியர் குழம்பு, அதி மதுரம், மருதம்பட்டைச் சூரணம் போன்ற பல சின்னச்சின்ன சித்த மருந்துகளின் பலன்கள், அவற்றை வீட்டிலேயே தயாரிக்கும் முறைகள், இரத்த அழுத்தம், நீரிழிவு நோய், தைராய்டு பிரச்சனைகளைக் கட்டுக்குள் வைக்கப் பின்பற்ற வேண்டிய உணவு முறைகள் என்று doctorஇடமிருந்து செய்திகள் அருவி போலக் கொட்டக் கொட்ட, நாங்கள் கை வலிக்க வலிக்க குறிப்பு எடுத்தோம். பிறகு அரை மணி நேரம் மனத்தை ஒருமுகப்படுத்தவும், உடல் நலத்திற்கும் உதவும் முத்திரைகள் சிலவற்றையும், புருவ மத்தியில் நினைவை நிறுத்தும் தியானத்தையும் பயிற்று வித்தார். கம்பங்கூழ் (கம்பு, மோர்), வேர்க்கடலை சுண்டல் (அவித்த வேர்க்கடலை, மாங்காய், இஞ்சி) மற்றும் பழங்களுடன் இரவு உணவு முடிந்தது. இங்கே தான் முதன்முறையாக குதிரைவாலி இட்லி, உழுந்தங்கஞ்சி, கம்பங்கூழ், இஞ்சி தேநீர், சாமை கூட்டாஞ்சோறு, தினைப் பாயாசம் போன்றவற்றை சாப்பிடடேன். இவ்வளவு சுவையான உணவுகள் இருக்க, அரிசிச்சோறும், சப்பாத்தியும் உலகின் பிரதான உணவுகளாக இருப்பது ஆச்சரியமாக இருக்கிறது.

ஒரு மருத்துவராக அல்லாமல், எங்களோடு இணைந்து, கலகலப்பாகப் பழகி, எங்கள் கேள்விகளுக்கெல்லாம் (எவ்வளவு பைத்தியக்காரத் தனமாக இருந்தாலும்) பொறுமையாக பதிலளித்து ஒரு நண்பராக Dr. செல்வ சண்முகம் அவர்கள் பழகியது, சித்த மருத்துவத்தின் மீது நம்பிக்கையையும் ஈடுபாட்டையும் எங்களுக்குத் தந்தது. இவ்வளவு ஏற்பாடுகளையும் செய்து, வேளா வேளைக்கு சமைத்து, சமையலுக்கு உதவி, சுத்தம் செய்து என்று தொடர்ந்து உழைத்துக் கொண்டேயிருந்தார்கள் தன்னார்வலர்களான திருமதி. செல்வி ரவி, திருமதி. வாணி மனோகரன், Dr. ரவி பழனியப்பன், Dr. சரவணன் குப்புசுவாமி மற்றும் திரு. சிவசண்முகம் சிவக்கொழுந்து ஆகியோர். பங்கேற்ற நாங்களும் notes எடுத்ததோடு நின்று விடாமல் உடனடியாக ஒரு Whatsapp குழுவைத் தொடங்கி, இந்தப் பட்டறையில் கற்றுக் கொண்டதை ஒவ்வொன்றாக, ஒவ்வொருவராகச் செய்து பார்த்து, எங்கள் அனுபவங்களைத் தொடர்ந்து பகிர்ந்து கொள்கிறோம்.