FETNA 2018 - அமெரிக்கத் தமிழ் முன்னோடிமுனைவர். கணபதி சண்முகம்

ஜூன் 30, 2018 அன்று, மண்ணியல் (Geology) துறையின் முதல் இந்தியராக வியக்கத்தக்க சாதனைகளைச் செய்து, பல விருதுகளைப் பெற்று, பெற்ற அறிவால் வையகம் தழைக்கத் தன் பங்கை அளித்து வரும் ஆழ்கடல் படிவியலாளர் (Deep-water Sedimentologist) முனைவர். கணபதி சண்முகம்அவர்களைப் பாராட்டி, “அமெரிக்கத் தமிழ் முன்னோடி” விருதைக் கொடுத்து கௌரவித்துள்ளது, வட அமெரிக்கத் தமிழ்ச் சங்கப் பேரவை (FETNA).

தமிழ் நாட்டில் உள்ள சீர்காழியில் 1944ல் திரு. கணபதி அய்யாவுக்கும், திருமதி. சம்பூர்ணம் அம்மாவுக்கும் மூத்த பிள்ளையாகப் பிறந்து வளர்ந்து, பின் 1970ல் அமெரிக்காவிற்குக் குடி பெயர்ந்தார், அண்ணாமலைப் பல்கலைக்கழகத்தில் இளங்கலைப் (Geology & Chemistry) படிப்புப் படிக்கையில் ஓயாத ஆஸ்துமா தொல்லையால் இரவு முழுதும் தூங்க முடியாமல் அவதிப்பட்ட இவர், அந்த இரவு நேரங்களைக் கடத்துவதற்காகத் தன்னுடைய பாடங்களைப் படிக்கத் தொடங்கினார். அவரே ஆச்சரியப்படும் படி முதல் மாணவராகத் தேர்ச்சி பெற, பல்கலைக்கழகத்தின் மண்ணியல்த் துறைத்தலைவர் திரு. முத்துசாமி அவர்கள், IITக்குப் போய் மேற்படிப்புப் படிக்கச் சொல்லித் தீவிரமாக ஊக்கப்படுத்தினார். பின் IIT – Bombayயிலும் (Applied Geology), Ohio Universityயிலும் (Geology) முதுகலைப் பட்டங்கள் பெற்று, University of Tennesseeல் (Geology) முனைவர் பட்டம் பெற்றார். அமெரிக்காவில் படிக்கும் காலத்திலேயே பகுதி நேர வேலை செய்து தன்னுடைய (சிறிய தங்கை சாவித்திரி 6 வயதிலேயே இறைவனடி சேர்ந்து விட) மூன்று தங்கைகளுக்கும் (தனலட்சுமி, சரஸ்வதி, சந்திரா) திருமணம் செய்து வைத்த இவர், அமெரிக்கக் கலாச்சாரப்படி முறையாக இரண்டு வருடங்கள் dating செய்து நாக்ஸ்வில்லைச் சேர்ந்த ஜீன் மரி பர்ஹம் அவர்களைத் திருமணம் செய்து கொண்டார்.

"கடலுக்கடியில் உள்ள படிமானப் படுக்கைகள் வண்டல் மண் நீரோட்டத்தினால் (turbidity currents) உருவானவை" என்று பரவலாக நம்பப்பட்ட கருத்தை உடைத்து, "கடலுக்கடியில் உள்ள படிமானங்கள், இயற்கையினால் அடர்த்தியான வண்டல் மண் நகர்ந்து (debris flows), உயர் அழுத்தத்தினால் உருவான ஒரு நிகழ்வு" என்ற உண்மையை உலகுக்கு வெளிப்படுத்தினார். இந்த உண்மை பெட்ரோலிய ஆராய்ச்சி உலகுக்கு ஒரு பெரிய திருப்பு முனையாக அமைந்தது. Dr. சண்முகம் அவர்களின் இந்த அரிய கண்டுபிடிப்பு, பெட்ரோலைக் கண்டுபிடிப்பதற்காகப் பல கோடிகள் செலவு செய்யப்பட்டுப் பல இடங்களில் துளையிடப்படுவது தடுக்கப்பட்டுச், சரியான இடங்களில் துளையிட்டுப் பெட்ரோலைக் கண்டுபிடிக்க உதவியது. இந்தச் சாதனை Mobil நிறுவனத்தில் (1978) மண்ணியல் ஆய்வாளர் (Research Geologist) பதவியைப் பெற்றுத் தந்தது. மண்ணியல்த் துறையின் பல்வேறு உட்பிரிவுகளில் 22 ஆண்டுகள் ஆய்வு/பணி செய்து தலைமை மண்ணியல் விஞ்ஞானியாகி (Geological Scientist), நிறுவனத்தின் இந்தப் பதவியை வகித்த ஒரே இந்தியர் என்ற பெருமையுடன் 2000ஆம் ஆண்டு ஓய்வு பெற்றார். ஆனால் அறிவியல் உலகம் இவரை ஓய விடவில்லை.

University of Texas (Arlington) ன் அழைப்பிற்கேற்ப 2003-2004வரை படிவியல் மற்றும் பாறை அடுக்கியல் (Sedimentology & Stratigraphy) வகுப்புகளை நடத்தினார்.

2010-2011வரை Research Institute of Petroleum Exploration & Development (RIPED) of Petrochina, Beijingல் விஞ்ஞான ஆலோசராகவும் இருந்துள்ளார் என்பது குறிப்பிடத்தக்கது.

தன்னுடைய ஆய்வுகளைப் பற்றி 380க்கும் அதிகமான ஆய்வுக் கட்டுரைகளை/நூல்களை வெளியிட்டுள்ளார். Journal of Paleogeography (Elsevier) ன் இணைப் பதிப்பாசிரியராகவும் (Associate Editor), Petroleum Exploration & Development (Elsevier) மற்றும் Journal of Indian Association of Sedimentologistsன் பதிப்புக் குழு உறுப்பினராகவும் (Member – Editorial board) இருந்திருக்கிறார். ஆராய்ச்சி மற்றும் விஞ்ஞானப் புத்தகங்களை வெளியிடும் உலகின் தலைசிறந்த Elsevier’s பதிப்பகம், இவருடைய இரண்டு (Elsevier’s Handbook of Petroleum Exploration and Production 2006, 2012-ஆங்கில மற்றும் சீனப் பதிப்புகள் உள்பட) புத்தகங்களை வெளியிட்டுள்ளது. முதன் முறையாக மண்ணியல் துறையில் ஒரு இந்திய விஞ்ஞானியின் புத்தகத்தை Elsevier’s பதிப்பகம் வெளியிட்டது நம் நாட்டுக்கே பெருமை.

விருதுகள்:

முதுகலையில் முதல் மாணவராகத் தேர்ச்சி பெற்றதற்கான IIT விருது - 1968

NAPE (Nigerian Association of Petroleum Exploration) - சிறந்த ஆய்வறிக்கை விருது - 1995

Millennium Edition of Marquis Who’s who in Science and Engineering இதழில் 40 நாடுகளிலிருந்து தேர்ந்தெடுக்கப்பட்ட 470 மண்ணியலாளர்களில் ஒரே இந்தியராக இவருடைய பெயர் பட்டியலிடப்பட்டது - 2000

Sedimentary Research இதழில் வெளியான “High-density turbidity currents: Are they sandy debris flows?” எனும் இவருடைய ஆய்வறிக்கை தான் அதிகமாக மேற்கோள் காட்டப்பட்ட ஒரே ஆய்வறிக்கையாக அறிவிக்கப்பட்டது - 1996

இது போல இன்னும் ஏராளமான விருதுகளைப் பெற்றுள்ள இவரின், சர்ச்சைக்குரிய ஆய்வுகளைப் பற்றிய நேர்காணல் சன் தொலைக்காட்சியின் “வணக்கம் தமிழகம்” நிகழ்ச்சியில் ஒளிபரப்பானது – 2003

சமீபத்தில், படிவியல் ஆய்வுத்துறையில் (Sedimentological Research) இவருடைய நீண்ட வெற்றிகரமான பயணத்தைப் பாராட்டி, 2018 Professional Achievement Awardஐ University of Tennessee வழங்கியுள்ளது. விருது வழங்கும் விழா Sep 21, 2018அன்று நடைபெறவுள்ளது.

University of Tennessee, IIT-Bombay மற்றும் அண்ணாமலைப் பல்கலைக் கழகங்களில் அறக்கட்டளை நிதியமைத்து (Endowment Fund), மாணவர்களுக்குக் கல்வியுதவி, நூலக மேம்பாடு, புதிய கட்டிடங்களைக் கட்டுதல் போன்ற பல உதவிகளைச் செய்து வருகிறார். இந்தியாவில் பல பயிற்சி முகாம்களை நடத்தியும், பல ஆராய்ச்சி மாநாடுகளில் சிறப்பு விரிவுரையாளராகவும் (key note lecturer) கலந்து கொண்டுள்ள இவர், தன்னுடைய ஆய்வும் அறிவும் அனைவருக்கும் பயன்பட வேண்டுமென்கிற நல்லெண்ணத்தில் இந்தியா, இங்கிலாந்து, அமெரிக்கா, சீனா, பிரான்ஸ், நைஜீரியா, இத்தாலி, நார்வே, சௌதி அரேபியா, நியூசிலாந்து போன்ற பல்வேறு நாடுகளில் உள்ள பள்ளிகளிலும், கல்லூரிகளிலும் தன்னுடைய ஆராய்ச்சிகளைப் பற்றி உரையாற்றி வருகிறார். சீர்காழியில் 1995-2008வரை ஆண்டுக்கொரு முறை ஆயிரம் மாணவர்களுக்குச் சீருடையும், பாடப்புத்தகங்களும், உணவும் வழங்கி வந்திருக்கிறார். கைம்பெண் மறுவாழ்வுக்காகத் தன்னை அணுகும் எவருக்கும் உதவி செய்து பெண்கள் வாழ்க்கையை முன்னேற்றுவதைத் தன்னுடைய முக்கியக் குறிக்கோளாகவும் வைத்திருக்கிறார்.

இன்னமும் தொடர்ந்து ஆய்வறிக்கைகளை வெளியிட்டுக் கொண்டு, தன்னுடைய ஆராய்ச்சிகளுக்கு ஊக்கமளித்து வரும் மனைவி ஜீனுடன் Irving, TXல் வசித்து வரும் இவர், சிறு வயதில் தான் ஆஸ்துமாவால் தூங்க முடியாமல் சிரமப்பட்ட போது இரவு முழுவதும் தனக்கு விசிறிக் கொண்டு தன் அருகிலேயே அமர்ந்திருந்த தன் தாய், பிற்காலத்தில் "இந்த மாதிரி ஒரு பிள்ளையை பெத்து வளர்ப்பது எப்படின்னு சொல்லுங்க?" என்று ஊர்க்காரர்கள் கேட்கத், தன் மகனை நினைத்துப் பெருமிதப்பட்டதை இன்றும் நினைவுகூர்கிறார்.

பல கோடி வருடங்களுக்கு முன் கடலுக்கடியில் இருந்து வெளித்தோன்றிய உயரமான மலைகளையும் (Appalachian, Alps, Ouachita) பாறைகளையும் பற்றித் தனியாகவும், ஒரு குழுவுக்குத் தலைமை ஏற்றும் பல ஆராய்ச்சிகளைத் திறம்பட மேற்கொண்டார். AAPG (American Association of Petroleum Geologists) ன் செய்தியறிக்கையில் தொடர்ந்து கட்டுரைகளை எழுதி வரும் Dr. G. சண்முகம் அவர்களின் ஆறு மண்ணியல்ப் புகைப்படங்களைத் (பாறைகளைப் படிப்பதற்காகத் தொடர்ந்து மலையேறும் போது வித விதமாகப் புகைப்படங்களை எடுப்பது இவரின் விருப்பமான பொழுதுபோக்கு) தனது செய்தியறிக்கையின் முதற் பக்கத்தில் வெளியிட்டு இவரைக் கௌரவித்துள்ளது AAPG.

“The Landslide Problem” என்று Googleல் தேடினால் இது தொடர்பாக இணையத்திலிருக்கும் 12 மில்லியன் ஆய்வறிக்கைகளில் இவருடையது தான் முதலில் வரும். இவருடைய பெரும்பாலான ஆய்வறிக்கைகளை/வெளியீடுகளை இலவசமாகப் பதிவிறக்கம் செய்து கொள்ள:

Blog (Deep-water processes): http://g-shanmugam.blogspot.com/

Research Gate: http://www.researchgate.net/profile/G_Shanmugam/publications

UTA Profile: http://www.uta.edu/profiles/Ganapathy-Shanmugam

சராசரி மாணவனாக இருந்த தான், ஆஸ்துமா பறித்த தூக்கத்தைப் பற்றிக் கவலைப்படாமல் அதைத் தனக்குச் சாதமாகப் பயன்படுத்திக் கொண்டதால் தான் இந்த அளவுக்குச் சாதிக்க முடிந்தது என்று திடமாக நம்பும் இவரின் தாரக மந்திரம்: “CONVERT OBSTACLE INTO OPPORTUNITY”. Dr. கணபதி சண்முகம் போன்ற நம்முடைய முன்னோடிகள் தான் நமக்கு வழிகாட்டிகள். வணங்குகிறோம்! வாழ்த்துகிறோம்!