அழகுத் தமிழில் “அமீலியா”

நந்தனும் நிதியும் அண்ணன் தங்கை. அவர்கள் அட்லாண்டா நகரத்தில் வசித்து வருகிறார்கள். நந்தன் பத்தாவது வகுப்புப் படிக்கிறான். நிதி எட்டாவது வகுப்புப் படிக்கிறாள். இருவரும் மிகவும் பாசமாக இருப்பார்கள். சில நேரங்களில் சண்டையும் போடுவார்கள். ஒரு நாள் திரு. இளங்கோ, அவர்களுடைய வீட்டிற்கு வந்தார். நந்தன் தான் கதவைத் திறந்தான். "வாங்க மாமா. உட்காருங்க." என்றபடி அவரை உள்ளே அழைத்து, உட்காரச் சொன்னான். "அட, இவ்வளவு நன்றாகத் தமிழில் பேசுகிறாயே!" என்றபடி திரு. இளங்கோ நாற்காலியில் உட்கார்ந்தார்.

நந்தன் லேசாகச் சிரித்து விட்டுத் "தண்ணீர் கொண்டு வருகிறேன், மாமா" என்று சமையல் அறைக்குச் சென்றான். அப்போது நந்தனின் அப்பா வீட்டிற்குள் இருந்து வந்தார். "வாருங்கள் இளங்கோ, நலம் தானே? என்றார். "நலம் தான். நந்தன் இவ்வளவு அழகாகத் தமிழில் பேசுகிறானே! கேட்கவே சந்தோஷமாக இருந்தது" என்றார் திரு. இளங்கோ.

"ஆமாம். அவனும் நிதியும் நன்றாகவே தமிழில் பேசுவார்கள். நாங்கள் எல்லோரும் வீட்டில் தமிழில் தான் பேசுவோம்" என்றார் நந்தனின் அப்பா. "நாங்களும் வீட்டில் தமிழில் தான் பேசுகிறோம். ஆனால் எங்கள் பிள்ளைகள் பிறரிடம் தமிழில் பேச வெட்கப் (shy) படுகிறார்கள்" என்று கவலையுடன் சொன்னார் திரு. இளங்கோ. "கவலைப்படாதீர்கள் இளங்கோ. சிறு வயதில் நந்தனும் நிதியும் கூட அப்படித்தான் இருந்தார்கள்.

நம் தமிழின் பெருமையை (greatness) அவர்களுக்குக் கதைகளாகச் சொன்னோம். இரண்டு வருடங்களுக்கு ஒரு முறை தமிழ் நாட்டுக்குப் போகும் போது கோவில்களையும் (temples), அரண்மனைகளையும் (palaces), கல்வெட்டுக்களையும் (inscriptions) காட்டி, நம்முடைய பாரம்பரியத்தைப் (heritage) பற்றிச் சொன்னோம். நாங்கள் ஊருக்குப் போகாத போது, நந்தனின் பாட்டி இங்கு வருவார். அப்போது பாட்டியுடன் பேசிப் பேசி, நம்முடைய சாப்பாடு, வந்தவரை வரவேற்கும் (welcoming guests) முறை ஆகியவற்றைத் தெரிந்து கொண்டனர். அதோடு, முக்கியமாகத் தமிழ்ப் பள்ளிக்குச் சென்று தமிழைப் படிப்பதாலும், ஆசிரியருடனும் (teacher), மற்ற மாணவர்களுடனும் (students) தமிழில் பேசுவதாலும், பிறரிடம் தமிழில் பேச வெட்கப் (shy) படுவதில்லை" என்றார் நந்தனின் அப்பா.

"இப்போது புரிகிறது. மொழிப் (language) பாடம் என்பது வாழ்க்கைப் (life) பாடம். நானும் என் பிள்ளைகளுக்குத் தமிழின் பெருமையைப் (greatness) பற்றிச் சொல்வேன்." என்றார் திரு. இளங்கோ. அப்போது நந்தன் தண்ணீரும், தட்டில் கொஞ்சம் பழங்களும் கொண்டு வந்து கொடுத்தான். "மாமா, மாமா, என் அமெரிக்கத் தோழி அமீலியாவிற்கு அவளுடைய பெயரைத் தமிழில் எழுதச் சொல்லிக் கொடுத்தேன். இதோ பாருங்கள்" என்றபடி ஓடி வந்தாள் நிதி. தமிழில் “அமீலியா” கூட அவ்வளவு அழகு.