மன்னிப்பு

வீட்டில் பெரிய சண்டை;

பதின்மூன்று வயது மகனுடன் தான்;

வாதம் செய்யும் வயது போல இது;

மறந்து வேறு தொலைத்து விட்டது;

நேரத்திற்கு தூங்கி, எழ – வாதம்!

நடுங்கும் குளிரில் கால்சட்டை அணிய – வாதம்!

வீட்டுப் பாடம் செய்ய – வாதம்!

காய்கறி சாப்பிட - தினமும் வாதம்!

ஒரு வாரமாக நடந்த வாதத்தை

முடிக்க வந்த சண்டை தான் அது;

வாய் வலித்து, அழுது, மனமுடைந்து

உறங்கச் செல்கையில் மணி பதினொன்று;

மறுநாள் பள்ளிக்குச் செல்கிறேன் அவனை அழைக்க,

இறுகிய முகத்துடன்,

காரில் என்னைப் பார்த்ததும் சிரிக்கிறான்,

அம்மா என்கிறான்,

தண்டிக்க மட்டுமே தெரிந்த என்னை

மன்னித்து விட்ட குழந்தை!