மதுர! மதுர! மதுர!
- ஜெயா மாறன்

- Mar 28, 2020
- 1 min read
Updated: Apr 6, 2020
மீனாட்சி ஆண்ட கதை சொன்ன மதுர!
பெண்ணாட்சி என்ற பாடம் தந்த மதுர!

ராணி மங்கம்மா கோலோச்சிய மதுர!
நாணிக் கிடந்த பெண்ணினத்தை
நிமிர்த்திய மதுர!
திருக்குறளை
அரங்கேற்றிய மதுர!
தங்கத் தமிழ்
தரணியிலே உயர
சங்கம் வைத்துத் தமிழ் வளர்த்த மதுர!
எங்கள் மொழிக்கு எவர் நிற்பர் எதிர?
மல்லிகை மட்டுமா மணக்கும் மதுர?
மானுடமும் சேர்ந்தே மணக்கும் மதுர!
தாதுப் பஞ்சத்துக் கஞ்சிக்காரி!
தாசியவள் பஞ்சு நெஞ்சுக்காரி!
தூயவள் குஞ்சரம்மாவை
தெய்வமாக்கிப் பெருமை பெற்ற மதுர!
களத்துமேட்டு விவசாயி
கட்டியிருந்த வேட்டி கண்டு
காந்தியும் ஆடை குறைத்த மதுர!
கீழடியில் மேல் எழும்புது மதுர!
வைகைக்கரை நாகரிகம் மிளிர!
பாமரனும் எழுதி வச்சான்
பானை ஓட்டில் பெயர!
இன்று இல்லை! நேற்று இல்லை!
ஈராயிரமாண்டு கால வரலாறு
இங்கு கண்டு உலகம் அதிர!
பாசக்காரப் பயக ஊரு எங்க மதுர!
(திரைப்)படம்பார்த்துப்பயப்படாமவாங்கமக்கா!


Comments