பனி நாள் கண்ட கந்தர்வத் திருமணம்

பூமித் தாய்க்குத் திருமணம்!

புது வகையான அமெரிக்கத் திருமணம்! வானியல் வல்லுநர் நாள் குறிக்க

விரைந்தோடும் நதியெல்லாம் சற்றே உறைந்து நிற்க, இளம்பச்சை இலை தளிர்த்து

பல வண்ணங்களில் பூத்துக் குலுங்கி, கடைசியில் கருஞ்சிவப்பாய்க் கருகி, தன் இலைகள் உதிர்ந்த துக்கத்தில் துறவுக்கோலம் பூண்ட மரங்களுக்கு,

வானத்து தேவதைகள் வெள்ளி மணிமாலை சூட்ட, கொட்டிய பனியில் கொள்ளை அழகுடன்-வெண் பட்டாடை உடுத்தியிருந்தாள் மணப்பெண்! அவள் தான் நம் பூமித்தாய் Selfie அழகிகளை எல்லாம் ஒரே நாளில் தோற்கடித்து, உலக அழகிப் பட்டத்தை வென்றாள் நிலமகள்!

பெற்றோரின் திருமண விழாக்காண

பொறுப்பாய் விடுமுறை விடப்பட்டது! நீர் மழையைக் கண்டு ஓடியவரெல்லாம் பனியில் குதித்தாடினர், பந்து விளையாடினர்! புது விருந்தாளியான பனி மனிதனும் பந்தியில் தொந்தியுடன் வந்தமர்ந்தான்! உண்டு, களித்து உறங்கச் சென்றோம்! - காலையில் வண்ணக் கதிர்களை விரித்துக் கொண்டு - நீல வானம் புடை சூழப் பிரகாசமாய்ச் சூரிய மாப்பிள்ளை வந்தார்! மஞ்சள் ஒளிபட, நாணத்தால் ஜொலித்தாள் மணப்பெண்! கொட்டிய பனியெடுத்து அட்சதை தூவிக் கெட்டி மேளமில்லாக் கந்தர்வத் திருமணம் கண்டோம்! வாழ வைத்தோரை வாயார வாழ்த்தி நின்றோம்!!!