பனி நாள் - 2017

டிசம்பர் -21, கார்காலம் தொடங்கும் தேதி. அரசின் இந்த அதிகாரப் பூர்வ அறிவிப்புத் தேதியைக் கிழித்தெறிந்து விட்டு, இரண்டு வாரங்களுக்கு முன்னதாகவே, கொட்டும் பனியோடு ஊரைக் கொள்ளையடித்தது (அழகால் தான்) இயற்கை. இளம் பச்சை இலை தளிர்த்து, பல வண்ணங்களில் பூத்துக் குலுங்கி, கடைசியில் கருஞ்சிவப்பாய்க் கருகி அவை உதிர்ந்த துக்கத்தில் துறவுக்கோலம் பூண்ட மரங்களுக்கு, வானத்து தேவதைகள் வெள்ளி மணிமாலை சூட்டி அழகு பார்த்த நாள் அது. எதிர்பாராமல் வந்த பனி மழையால் பணிக்கும், பள்ளிக்கும் விடுமுறை வந்தது. நீர் மழையைக் கண்டு ஓடியவரெல்லாம் பனி மழையில் குதித்தாடினர். Selfie அழகிகளை எல்லாம் ஒரே நாளில் தோற்கடித்து, உலக அழகிப் பட்டத்தை வென்றாள் இயற்கைக் கன்னி!

பனியே!

நீ பார்ப்பதற்கு அழகாகத் தான் இருக்கிறாய்!

பந்து விளையாட்டுக்கும் புது அர்த்தம் தருகிறாய்!

பனி மனிதனை வீட்டு விருந்தாளியாக்குகிறாய்!

அதற்காக, இங்கேயே இருந்து விடாதே

இரண்டு நாளில் உருகி விடு

பிழைப்புக்குப் பணி செய்ய வேண்டுமே!

ஒரு மாதம் கழித்து மீண்டும் வா.....

ஓடியாடிப் பந்து விளையாடலாம்!

என்று கவிதைகளும் காட்சிகளும் முகநூலை நிறைத்தன. ஆடிக்களித்து தங்களுக்கென ஒரு பனி மனிதனைச் செய்து, அதைக் கொஞ்சி விட்டு, வெள்ளையடிக்கப்பட்ட இருட்டை ரசித்தபடி நித்யாவும், நரேனும் அவர்களின் மகன் கவினும் உறங்கிப் போயினர்.

விடிந்தும் இந்த வெள்ளை மழை தந்த கொள்ளை

அழகைக் காணத் தன் வண்ணக் கதிர்களை விரித்துக் கொண்டு, நீல வானம் புடை சூழ, நான் நான் என முந்திக் கொண்டு வந்தது சூரியன். இப்படி ஜொலிக்கும் காலையைக் கண்டு விடுமுறையையும் மறந்து விழித்த போது தான், பனி சற்றும் உருகாமல் கட்டியாகி விட்டது தெரிந்தது. இப்படியே விட்டால் வழுக்கி விடும். காரை வேறு எடுக்க வேண்டியிருந்தது. அதனால் ஓடு தளத்தில் (drive way) இருந்த பனியை வாரித் தள்ளினான் கவின். பனி மனிதனை உருவாக்கும் போதிருந்த உற்சாகம் இப்போது இல்லாவிட்டாலும், எந்த எதிர்ப்பும் சொல்லாமல் கவின் செய்யும் வேலைகளில் இதுவும் ஒன்று. அப்பா நரேன் சிறிய உதவி செய்ய முன் வந்தால் கூட மறுத்து விடுவான். தன்னால் முடியும் என்னும் பெரியமனிதத்தனம் வந்துவிடும். அரை மணியில் ஒரு காரை எடுக்குமளவுக்கு ஓடு தளம் சுத்தமாகி விட்டிருந்தது. வியர்த்த படி, உள்ளே வந்து sofaவில் விழுந்தான். சற்று நேரம் கண்ணை முடிக் கிடந்தான். அப்போது தான் எதிர் வீட்டிலிருந்து Barry தொலைபேசியில் அழைத்தார். நரேன் தான் பேசினார். எதிர் வீட்டு Barryயும், Joannம் வயதான தம்பதியர். கவின் பனியை வாரித் தள்ளுவதைப் பார்த்தவுடன் தங்களின் ஓடு தளத்தையும் சுத்தம் செய்ய முடியுமா என்று கேட்பது வழக்கம். “பார்த்தியா கவின், உனக்கு அதுக்குள்ள வாடிக்கையாளர் வந்தாச்சு” என்றார் நரேன் தொலைபேசியில் கைய வைத்து மறைத்த படி. “Mr. Barry தானே” என்றான் கவின். “ஆமாம். உனக்கு எவ்வளவு கூலி தரணும்னு கேக்குறார்” என்றார் நரேன். “$20னு சொல்லுங்கப்பா. போன வருடம் அதான் தந்தார். ஆனால், கொஞ்ச நேரம் கழிச்சு செய்யுறேன்” என்றான் அலைபேசிக்குள் தலையை விட்டபடி.

அடுத்த ஒரு மணி நேரத்தில் வேலையை முடித்து விட்டு வந்தவன் கையிலிருந்த இரண்டு $ நோட்டுக்களை மேசையில் வைத்துவிட்டு மாடிக்குச் சென்றான். சமையலில் மூழ்கியிருந்த நித்யா, சிறிது நேரம் கழித்துத் தற்செயலாக மேசையின் மேலிருந்த இரண்டு நோட்டுக்களையும் பார்த்தாள். ஒரு $20 நோட்டும் அதன் மேல் ஒரு $10 நோட்டுமாக மொத்தம் $30 இருந்தன. $20 தானே தருவதாகச் சொன்னார் என்று நினைத்தபடி, கவினை அழைத்து விசாரித்தாள். “கவின், $30 தந்திருக்காரே!” என்று நித்யா சொல்ல, “இல்லம்மா, $20 தான் தந்தார்“என்றான் கவின். “நீ தானே மேசையில் இந்த இரண்டு நோட்டுக்களையும் வச்ச” என்று நித்யா கேட்க "ஆமாம்மா”என்றான் கவின். “இதில ஒரு $20 நோட்டும் ஒரு $10 நோட்டும் இருக்கே!” என்று ஆச்சரியத்துடன் கேட்டவளுக்கு, “அப்படியா? நான் மேலே இருந்த $10 நோட்டை மட்டும் பாத்துட்டு, கீழ இருந்ததும் $10 நோட்டுதான்னு நெனைச்சேன். நான் கவனிக்கலம்மா” என்று மேலேயிருந்த படியே சொல்லி விட்டுக் குளிக்கச் சென்றுவிட்டான் கவின்,

இனி நித்யாவுக்கும் நரேனுக்குமான உரையாடல் ………………

“அப்ப $10 லாபம் தான் அவனுக்கு”

“$20 னு சொல்லிட்டு ஏன் $30 குடுக்கணும்?”

“அவருடைய ஓடு தளம் ரொம்பப் பெரிசு. நிறைய வேலை. அதனால அவரே கூடக் குடுத்திருப்பார்”

“இவன் தெரியாம வாங்கிட்டு வந்த மாதிரி, அவரும் பாக்காமாக் குடுத்திட்டாரோ? என்னவோ?”

“$10 தானே, விடு”

“$10 தான். உழைப்புக்கு குடுத்திருந்தா பிரச்சனை இல்லை. ஆனா, பாக்காமாக் குடுத்திருந்தா?”

“அவரு கூப்பிட்டாரு, இவன் போய் வேலை செஞ்சான். ரொமபக் கஷ்டமான வேலை. அதனால அவரே $10 கூடக் குடுத்திருக்கார். அவ்வளவு தான். இதைப் போய் பெரிசு படுத்திக்கிட்டு”

“இல்ல. நமக்கு எதுக்கு மத்தவங்க பணம்?”

“இப்ப என்ன? இந்தப் $10 ஜத் திருப்பிக் குடுத்துட்டா

நிம்மதியா இருக்குமா? குடுத்துரலாம்”

ஒரு வழியாக இந்த விவாதம் முடியவும், கவின் குளித்துவிட்டுக் கீழே வரவும் சரியாக இருந்தது. கவின், "நீங்க $10 கூடக் குடுத்திட்டீங்கன்னு சொல்லி, Mr. Barryகிட்ட இதத் திருப்பிக் குடுத்திட்டு வந்திடு" என்றபடி, அவன் கையில் $10 நோட்டை வைத்தாள் நித்யா. அவனும் எதாவது விவாதம் செய்வான் என்று எதிர்பார்த்தவள் ஆச்சரியப்படும் படி, எதுவுமே பேசாமல் பணத்தை வாங்கிக் கொண்டு எதிர் வீட்டை நோக்கி ஓடினான் கவின்.

"நேர்மையாக இருப்பது பிள்ளைகளுக்கு எளிதாகத்தான் இருக்கிறது. பெரியவர்களுக்குத் தான் கடினமாக இருக்கிறது".