பெண்மை என்பது.........

அச்சம், மடம், நாணம், பயிர்ப்பென்றாள் பாட்டி!

பொறுமை, அடக்கம், பக்குவமென்றாள் அம்மா!

அறிவு, திறமை, விடாமுயற்சி என்றேன் நான்!

ஆணுக்கிங்கே சமம் - என்றாள் மகள்…..

சாதனைப் பெண் அவள் -

சமையல் சூத்திரங்கள் தெரியாது!

தலைமைப் பதவி வகிப்பவள் அவள் -

தாய்மைக்கான பொறுமை கிடையாது!

தங்கப் பதக்கம் வென்றவள் அவள் –

தாம்பத்ய சூட்சமம் தெரியாது!

அளவிலாச் சுதந்திரமே ஆபத்தானது அவளுக்கு-

அதிலிருந்து காக்கும் சூதானமோ தெரியாது!

பாட்டியும் அம்மாவும் வந்து, வந்து போனார்கள் - கண் முன்!

அனைத்தையும் படைத்து, ஆதாமைப் படைத்தவன்,

ஏற்றமிகு படைப்பென ஏவாளையே படைத்தான்!

இவளே ஆக்கும் சக்தியென்றான்!

இனி உலகம் செழிக்குமென்றான்!

இயல்பு மறந்த ஏவாளோ - வெறும் ஆதாமாகத் துடிக்கிறாளே!!!

உரிமைக்காகத்தானே போராடினோம்!

உருமாறிப் பண்பிழக்கவா போராடினோம்!

ஆண் போல் மாறினால் ஆணை வெல்லலாமாம்!

அவனை வென்று விட்டு, யாரோடு வாழ???

அவனை வெல்வது மட்டுமே குறிக்கோளானது எப்போது?

பெண்மை தொலைக்காத முழுப் பெண்ணாயிருப்போம்!

பெற்ற உரிமை கொண்டு பெண்ணினம் உயர்த்துவோம்!

ஒதுக்கீடே தேவையில்லை, ஒய்யார இருக்கை நம் கையில்!!!