தாய்மொழி நாள்!

தாய்மொழி நாள் எதற்கு? தொலைக்கிறோமா? நம் தமிழை! அறிஞர் மொழி அவருக்கே வெளிச்சம்! கவிஞர் மொழி கவிஞருக்கே வெளிச்சம்! கற்றறிந்தோரை முற்றிலும் நெருங்க முடியவில்லை! பற்றாளர் எல்லாம் 'மொழி' 'மொழி' என்பார்! பிள்ளைக்குச் சொல்லும் வழி சொல்லார்!

இலக்கண மொழி இலகுவாயப் புரியவில்லை! தமிழ் ஆசிரியரெல்லாம் 'தமிழ் அம்மா'வாயினர்! தவறியும் அன்பு காட்டக் கண்டிப்பாய் மறுத்தனர்! 'தமிழ் அம்மா'வையும் வெறுத்தோம் - அதனால் தாய் மொழியையும் விட்டு விலகினோம்! இப்படித்தான் வளர்ந்தோம்!

இன்னொரு நாட்டில் ஞானம் பிறந்தது! இணையில்லாச் செல்வமாம் இலக்கியத்தை இக்காலச் செல்வமாம் இணையம் வழி கற்றோம்! இனித்திடுதே தேனாய்! இந்தச் சுவை தொலைத்தோமே இத்தனை நாளாய்! என ஏங்குகிறோம்! ஆன்றோரே! சான்றோரே! இச்சிறியவளின் அன்பான வேண்டுகோள் இந் நன்னாளில்! இறுக்கம் தளர்த்தி தமிழ் இன்பம் தருவீரோ! இருகரம் பற்றி அழைத்து வருவோம் விலகியோரை!- ஒரு நாளுக்குள் அடக்க வேண்டாம் தாய் மொழியை! நம் இனத்தின் அடையாளமது!