தைப் பொங்கலும்! தமிழ்ப் புத்தாண்டும்!

ஏகாதசி, கார்த்திகை, சதுர்த்தி, தீபாவளி

எல்லாம் சம்பிரதாயக் கொண்டாட்டங்கள்!

புனைக்கதைகளின் புகழாரங்கள்!

புத்தாடைகளின் அணிவகுப்பு!

பட்டாசுகளின் கொந்தளிப்பு!

கடைப் பலகாரங்களால், வயிற்றுக் கடுப்பு!

பொது விடுமுறை ஒன்றே கதகதப்பு!

தைப் பொங்கல் தான் தித்திப்பு!

மனதிற்கும், நாவிற்கும் இனிப்பு!

உழைப்பின் பயன் கண்ட

உழைப்பாளிக்கு ஒர் அன்பளிப்பு!

உழுது உணவு தந்த உழவனுக்கு,

சளைக்காமல் உதவிய மாடுகளுக்கு,

கலங்காமல் கதிர் தந்த கதிரவனுக்கு,

பொய்க்காமல் பெய்ததால் மழைக்கு,

மிதித்தாலும் மடி தந்த மண்ணுக்கு,

நம் செய்யும் நன்றிப் படைப்பு!

அலுக்காமல் குடித்து, அரை நினைவோடு

ஆடிப் பாடி, ஆயுளைக் குறைக்கும்

ஆங்கிலப் புத்தாண்டு கிடக்கட்டும்! - 2

அடுக்கி வரும் துயரத்தை

ஆண்டு தோறும் அனுபவிக்கும்,

களத்துமேட்டு விவசாயிய நெனச்சு

கெழக்க பாத்து பொங்க வச்சு

விதவிதமா வீட்டுலயே காய் சமைச்சு

விருந்துண்ண வரச்சொல்லி

விரும்பிக் கொண்டாடுவோம்

தை முதல் நாளை – நம் தமிழ்ப் புத்தாண்டை!

வாழ்வாங்கு வாழ்வோம் தமிழோடு!