உழவே உயர்வு

நாத்து நட்டு, களையெடுத்து, கருதறுத்து, போரடிச்சு,

முத்து முத்தா நெல் மணி;

இது தான் விவசாயம் - புத்தகத்தில படிச்சவகளுக்கு;

சேத்துல கால வச்சு வெவசாயம் செஞ்சவுக கத வேற!

நூறு நாள் வேலத்திட்டம் வெனையா வந்துச்சு!

நடவுக்கு ஆள் புடிச்சு, கூலி குடுத்து, பறவை வெரட்டி,

காவக்காத்து, நெல்ல வீடு கொண்டாரதுக்குள்ள.........

நடவுல பூமியும் வருணனும் வெளையாடணும்;

கருதறுக்கையில கா விடணும்;

எசைப்பாட்டு பாடிக்கிட்டு வேல செஞ்சதெல்லாம்

முதல் மரியாதை சினிமாவோட போச்சு!

உழைப்புக்கு கூலி தருவா காளியாத்தான்னு காத்திருந்தா.........

வியாபாரி வந்து வெல வெப்பான் - அடிமட்ட வெல!

வீட்டுக்குன்னு வச்சிருந்த ஒரு மூட்டையையும் தூக்கி குடுப்பா கட்டுனவ!

‘நம்ம சந்தையில அரிசி வாங்கிகிருவோம் மாமா’ம்பா!

கடன் கட்டி, வெத நெல்லு வாங்கி, காசு சரியாப்போவும்!

உழவு தெரிஞ்ச நமக்கு, உழவுத் தொழில் தெரியாமப் போச்சே!

புரட்சின்னு பூச்சிக்கொல்லி அடிக்கச் சொன்னாக,

இன்னும் வேணும்னு இரசாயன உரம் போடச்சொன்னாக,

பூமி ஆத்தா கருப்பையில அடிச்சுப்புட்டீங்களேடான்னு,

வருணன் கோவிச்சுக்கிட்டுப் போயி அஞ்சாறு வருஷமானது ஒரு கத!

அஞ்சு ஏக்கர் நெலத்த அப்பார்ட்மெண்ட் காரகளுக்கு

அஞ்சு கோடிக்கு வித்துப்புட்டு

ஆடி கார் வாங்கி, குஜராத்து வெவசாயி

அகமதாபாத்து போனது ஒரு கத!

எலிக்கறி தின்னது ஒரு கத!

எங்க சனம் நாண்டுக்கிட்டுச் செத்தது ஒரு கத!

சின்ன ஒளிக்கீத்தா வந்தாரு நம்மாழ்வாரு -

பெரிய்ய நம்பிக்கை தந்தாரு!

பாழான நெலத்தை மீட்டெடுக்கவும்,

இயற்கை வெவசாயத்துக்கும் வழி சொன்னாரு!

எப்படியும் காவிரி வரும்-ஆத்து மண்ண மட்டும் விட்ருங்க சாமி!

ஒரு நாள் மழையும் வரும்-வீட்டுக்கொரு மரம் நடுங்க சாமி!

மாட்டைக் காத்து, நாட்டைக் காத்த சனம்,

மண்ணையும் காக்கும்னு நம்பிக்கெடக்கோம்!