அன்பாக வளர்த்திருக்கலாமே அம்மா!

மூத்த மகனாய்ப் பிறந்து என்

தாய்மையை உலகுக்கு அறிவித்தவனே!

நானே விவரமில்லாத ஒரு குழந்தை

எனக்கு இன்னொரு குழந்தை!

என் சிறுவயது சேட்டைகளை

எனக்கு நினைவூட்டியவனே!

உன்னை வளர்த்ததை விட

வசைபாடியது அதிகம்!

சிவனுக்குப் பிரணவ மந்திரப் பாடம் சொன்னவன் வடிவேலன்!

எனக்குப் பிள்ளை வளர்க்கும் பாடம் சொன்னவன் என் மகன்!

படித்து முடித்து வேலை வாங்கி நீ விடைபெறுகையில்

பெருமை பொங்கப் பார்த்திருந்தேன்!

“இன்னும் கொஞ்சம் அன்பாக வளர்த்திருக்கலாமே அம்மா”

என்றாய்! இடிந்து போனேன்!

இன்னொரு முறை வந்து பிள்ளையாகப் பிறப்பாயா?