மகள்

மகளே!

என் வீட்டில் வந்து பிறக்கவில்லை நீ - இருந்தும்

என் தோழிகளின் பிள்ளைகளில் எல்லாம் நீ தெரிகிறாய்

என் வீட்டில் வந்து பிறக்கவில்லை நீ - இருந்தும்

என் தமிழ்ப்பள்ளி மாணவிகளில் எல்லாம் நீ தெரிகிறாய்

என் வீட்டில் வந்து பிறக்கவில்லை நீ - இருந்தும்

நான் கேட்கும் சலங்கை ஒலிகளில் எல்லாம்

உன் பிஞ்சுப் பாதங்களே தெரிகின்றன -

மகளே!

என் வீட்டில் வந்து பிறக்கவில்லை நீ

உனக்காக எத்தனை கடைகள் ஏறி இறங்கியிருக்கிறேன், தெரியுமா?

அங்கிருக்கும் கவுன்களில் எல்லாம் உன் பிம்பத்தை

ஏந்தியே ஏங்கியிருக்கிறேன், தெரியுமா?

என் மகனை நீயாக்கி அழகு பார்த்திருக்கிறேன், தெரியுமா? - இருந்தும்

'எனக்கொரு பொம்பளப்புள்ள பொறக்கலையே' என்று புலம்புகிறேன்

காரணமான கணவனை தினம் தினம் திட்டுகிறேன் - ஆம்

எனக்கும் கொஞ்சம் அறிவியல் தெரியும்!

மகளே!

என் வீட்டில் வந்து பிறக்கவில்லை நீ - நல்லது தான்!

பேதை முதல் பேரிளம்பெண் வரை

வதைக்கும் இந்த வஞ்சக உலகில்

நீ வந்து பிறக்காததும் நல்லது தான்!

நிம்மதியாக என் கனவிலேயே வாழடி என் கண்ணே!